Sony’нинг эмодзилар ҳақидаги фильми биринчи тизери чиқди. Вертикал видео!

Sony Pictures Animation компанияси эмодзилар ҳақидаги «Эмодзи: Фильм» (Emoji: Movie) номли фильмнинг тизерини эълон қилди, деб хабар бермоқда TJournal.

«Салом. Кўриб турганингиздек, мен – эмодзи. Биринчи фильмимиз ҳақида эълон қилишдан мамнунман», – дейди чарчаган эмодзи тизер аввалида.

Фильм сюжети бўйича эмодзилар телефон ичидаги Текстополис мессенжерида яшайди ва ҳар бир эмодзи фақатгина битта юз тузилишига эга бўлади. Аммо бош қаҳрамон Жин бундан мустасно, у ўз ҳиссиётларини ўзгартира олади. Жин дўстлари билан телефондаги кодни тўғрилаб, ҳаммага ўхшаш учун саргузаштга отланади.

Кинокартинанинг овоз бериш жараёнида қизиқчи Стивен Райт, актёрлар ТиЖей Миллер, Жеймс Корден ва Илана Глазер иштирок этди. Фильм режиссёри Энтони Леондис бўлди.

«Эмодзи: Фильм» кинокартинасининг премьераси 2017 йилнинг 4 августида бўлиб ўтиши режалаштирилган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.