Туркиялик ҳарбий хизматчилар Ироқ ҳудудини Мосул шаҳрини ИШИД террорчилик гуруҳидан озод қилиш бўйича операция якунлангач, тарк этади. Бу ҳақда Туркия бош вазири Биноли Йилдирим ўзининг ироқлик ҳамкасби Ҳайдар ал-Ободий билан телефон суҳбати чоғида маълум қилди, деб ёзади «ТАСС».
«Биз Башика ҳарбий лагерини (Мосулдан 19 км шимолда) тарк этамиз, — деди Йилдирим. — Туркия кучларининг миссияси Мосулнинг озод қилиниши билан тугайди». Бундан ташқари, Туркия бош вазири Анқара «мамлакатлар ўртасидаги савдо ва иқтисодий алоқаларни мустаҳкамлаш»га интилишини таъкидлади.
Ироқ ҳукумат кучлари кўнгилли аскарлар ва АҚШ раҳбарлигидаги халқаро коалиция авиацияси кўмагида октябрь ўрталаридан Ироқнинг иккинчи энг йирик шаҳри Мосулни ИШИД террорчилик гуруҳидан озод қилиш бўйича операцияни олиб бормоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)