АҚШ тарихида илк орбитал парвозни амални оширган астронавт Жон Гленн 95 ёшида ҳаётдан кўз юмди

АҚШ тарихида илк орбитал парвозни амални оширган астронавт Жон Гленн 95 ёшида ҳаётдан кўз юмди. Бу ҳақда Columbus Dispatch хабар бермоқда.

Жон Гленн Огайо штатидаги шифохонада яқинлари даврасида вафот этди.

1959 йил апрелида Гленн америкалик астронавтларнинг биринчи гуруҳи таркибига қабул қилинган ва «Меркурий» дастури доирасида коинот парвозларига тайёргарлик кўрганди. У Юрий Гагарин ва Герман Титовдан сўнг орбитал коинот парвозини амалга оширган дунё тарихидаги учинчи, АҚШда эса илк инсон бўлди. У 1962 йил 20 февралда «Меркурий-Атлас-6» кемасида уч бор Ер атрофида айланиб чиқди. Қайтганидан сўнг NASA томонидан «Фидокорона хизматлари учун» медали билан тақдирланди.

Жон Гленн иккинчи парвозини 1998 йилда 77 ёшида «Дискавери» кемасида амалга оширган ва коинотда бўлган энг кекса кишига айланганди. Мазкур тажрибадан мақсад коинотнинг қариётган организмга таъсирини ўрганиш бўлган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.