Қодиров Сурияга «Шарқ» ва «Ғарб» батальонларининг жўнатилиши ҳақидаги хабарларни изоҳлади

Чеченистон Республикаси раҳбари Рамзан Қодиров махсус топшириқли бўлинмаларнинг Чеченистонга жойлаштирилган «Шарқ» ва «Ғарб» батальонлари жангчилари Сурияга кўчирилиши ҳақидаги маълумотни рад этди, дея хабар бермоқда «Интерфакс» унинг Instagram саҳифасига таяниб.

«Ишонч билан айтаманки, Чеченистон Республикасида ҳеч қандай ‘Шарқ’ ва ‘Ғарб’ батальонлари йўқ», — деб ёзди Қодиров ўз Instagram’ида.

Унинг таъкидлашича, республикага, Россиянинг бошқа ҳудудларида бўлгани каби, Россия мудофаа вазирлиги бўлинмалари жойлаштирилган. «Уларда Чеченистон ва федерациянинг бошқа субъектлари фуқаролари хизмат ўтайди. Россия қўшинлари Сурияда қуруқликдаги операцияларда иштирок этмаслиги яхши маълум», — дея қайд этди Чеченистон раҳбари.

Унинг қўшимча қилишича, агар Чеченистонга жойлаштирилган қисмлар ҳарбий хизматчиларига Россиянинг Суриядаги авиабазасини қўриқлаш хизматини ўташ ҳақида буйруқ келиб тушса, «улар жуда бахтли одамлар бўларди».