Россия истеъмолчилар ҳуқуқлари ҳимояси ва инсон фаровонлиги соҳасидаги назорат бўйича федерал хизмати («Роспотребнадзор»)нинг Тува Республикасидаги бошқармаси «Прогресс МС-04» космик кемасининг иккита бўлаги топилган жойда юқори даражада ион ҳосил қилувчи нурланиш ва кимёвий хавфни аниқламади. Бу ҳақда республика раҳбари Шолбан Кара-оол ўз Facebook саҳифасида маълум қилди, деб ёзади «РИА Новости».
«‘Роспотребнадзор’нинг Тува бўйича бошқармаси Улуг-Хем туманида ‘Прогресс МС-04’ космик кемасининг иккита бўлаги қулаган жойда — тоғ ёнбағри ва ўтов яқинида барча ўлчаш ишларини олиб борди. Бунда ҳаводаги кимёвий моддаларнинг миқдорини ўлчайдиган таҳлил қилувчи ускуналардан фойдаланилди, қор қатламидан ва очиқ булоқдаги сувдан таҳлил учун намуналар олинди. Ҳар иккала ҳолатда ҳам юқори даражада ион ҳосил қилувчи нурланиш ҳолатлари аниқланмади, ҳавода кимёвий моддалар топилмади», — дейилади хабарда.
Шолбан Кара-оол ҳамюртларидан бўлаклар қулаб тушган жойдан топилган металл буюмларга тегмасликни сўради.
Халқаро космик станцияга учирилган «Прогресс-МС-04» кемаси 1 декабрь куни кечқурун Тува осмонида ҳалокатга учради. Бўлакларнинг кўп қисми атмосферада ёниб кетди. Қолган қисми Қизил шаҳридан 60—70 км узоқликка тушди.
Изоҳ (0)