Таиланднинг янги қироли Маха Вачиралонгкорн Бодинтхаратхеппхаяварангкун (Рама Х)нинг портретлари монах тахтга ўтирганидан сўнг эртаси куни Бангкок кўчаларида пайдо бўлди, деб ёзади «ТАСС».
Таиланд анъаналарига кўра безатилган ўнлаб меҳроблар пойтахтдаги баъзи бинолар олдида эрта тонгданоқ пайдо бўлди, валиаҳдлик жараёни якунлангани ҳақида эса маҳаллий вақт билан 1 декабрь куни 22:00 дагина эълон қилинган эди (Тошкент вақти билан 20:00).
Бош вазир ўринбосари Виссану Креа-Нгамнинг маълум қилишича, Рама Х тахтга ўтирганига қарамай, Таиланд кўчалари ва давлат биноларининг олд қисмлари аввалгидек унинг марҳум отаси портретлари билан безатилади. Бундан ташқари, мамлакатда мотам сақланиб қолади, унга барча давлат амалдорлари ва давлат компаниялари ходимлари риоя қилиши керак. Йил давомида улар қора ва оқ рангли либос ёки енгига мотам боғичи боғланган хизмат униформасини кийиб юриши керак.
Эслатиб ўтамиз, марҳум Таиланд қироли Пхумипон Адульядетнинг (Рама IX) ягона меросхўри ва валиаҳди Маха Вачиралонгкорн 1 декабрь куни Таиланд ҳукмдори бўлиш таклифини қабул қилди ва тахтга чиқди.
Изоҳ (0)