Россия Қирғизистоннинг стратегик шериги бўлиб қолади, бироқ ҳарбий соҳада республика ўзининг кучига таяниши керак. Бу ҳақда мамлакат президенти Алмазбек Атамбаев йил якунлари бўйича ўтказилган матбуот анжумани чоғида маълум қилди, дея хабар беради «РИА Новости».
«АҚШнинг ‘Ганси’ авиабазаси бўйича, бу кимгадир ёқадими-йўқми, мутлақо тўғри қилдик, деб ҳисоблайман. Орадан 5 йил ўтди ва бу қарор тўғри бўлганини вақтнинг ўзи кўрсатди. Қирғизистон келгусида фақат ўз кучига ишониши керак. Бу Россия базасига ҳам тегишли», — дея таъкидлади Атамбаев.
Президент мазкур база шартнома муддати тугаганидан сўнг Қирғизистон ҳудудини тарк этиши зарурлигини билдирди. «Мен бу фикрни Россия президентига ҳам етказдим ва у мени тушунди», — деди давлат раҳбари.
Маълумот учун, Қирғизистонда Россиянинг бирлашган ҳарбий базаси жойлаштирилган бўлиб, 2009 йили келишув муддати автоматик тарзда 25 йиллик даврларга узайтирилиши эҳтимоли билан 49 йилга чўзилганди. «Биз бунинг ўрнига 15 йилни қолдиришга қарор қилдик», — деди Қирғизистон президенти.
Изоҳ (0)