Rossiya Qirg‘izistonning strategik sherigi bo‘lib qoladi, biroq harbiy sohada respublika o‘zining kuchiga tayanishi kerak. Bu haqda mamlakat prezidenti Almazbek Atambayev yil yakunlari bo‘yicha o‘tkazilgan matbuot anjumani chog‘ida ma’lum qildi, deya xabar beradi “RIA Novosti”.
“AQShning ‘Gansi’ aviabazasi bo‘yicha, bu kimgadir yoqadimi-yo‘qmi, mutlaqo to‘g‘ri qildik, deb hisoblayman. Oradan 5 yil o‘tdi va bu qaror to‘g‘ri bo‘lganini vaqtning o‘zi ko‘rsatdi. Qirg‘iziston kelgusida faqat o‘z kuchiga ishonishi kerak. Bu Rossiya bazasiga ham tegishli”, — deya ta’kidladi Atambayev.
Prezident mazkur baza shartnoma muddati tugaganidan so‘ng Qirg‘iziston hududini tark etishi zarurligini bildirdi. “Men bu fikrni Rossiya prezidentiga ham yetkazdim va u meni tushundi”, — dedi davlat rahbari.
Ma’lumot uchun, Qirg‘izistonda Rossiyaning birlashgan harbiy bazasi joylashtirilgan bo‘lib, 2009-yili kelishuv muddati avtomatik tarzda 25 yillik davrlarga uzaytirilishi ehtimoli bilan 49 yilga cho‘zilgandi. “Biz buning o‘rniga 15 yilni qoldirishga qaror qildik”, — dedi Qirg‘iziston prezidenti.
Izoh (0)