Ўзбекистон Республикаси президентлигига номзод Хатамжон Кетмонов сирдарёлик сайловчилар билан учрашди. Сардоба туман ҳокимлигининг мажлислар залида видеоконференция тарзида ташкил этилган учрашувда туманлардаги студиялар орқали 2 мингга яқин сайловчи иштирок этди. Бу ҳақда ЎзХДП матбуот хизмати маълум қилди.
Учрашувни Ўзбекистон Республикаси Олий Мажлиси Қонунчилик палатаси депутати Абдуғаффор Қирғизбоев олиб борди. Номзоднинг ишончли вакили, халқ депутатлари Сирдарё вилоят Кенгаши депутати Алишер Тошматов йиғилганларни Хатамжон Кетмоновнинг таржимаи ҳоли билан таништирди.
Шундан сўнг сўз Ўзбекистон Республикаси Президентлигига номзодга берилди. Хатамжон Кетмонов Сирдарё вилояти бир пайтлар Мирзачўл деб аталгани ва мустақиллик йилларида мамлакатдаги энг истиқболли минтақаларидан бирига айлангани, бугунги кунда эса электр энергетикаси, енгил саноат, озиқ-овқат ҳамда қурилиш материаллари ишлаб чиқариш ривожланган ҳудудлардан бири ҳисобланишини таъкидлади.
Номзод 4 декабрь куни бўлиб ўтадиган сайловда сирдарёликлар ҳам фаол иштирок этишига ишонч билдирди.
Маъруза юзасидан бир қатор иштирокчилар сўзга чиқди. Шундан сўнг савол-жавобларга ўтилди. Унда сайловчилар ўзларини қизиқтирган саволларга номзод ва унинг ишончли вакилларидан атрофлича жавоб олди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)