«Ўзбекистон Республикаси Президенти сайлови тўғрисида»ги Қонуннинг 5-моддасига мувофиқ, сайловга тайёргарлик кўриш ва уни ўтказишга доир тадбирлар, шунингдек, ҳар бир сайлов участкасида сайлов куни овоз бериш хоналарида ва овозларни санаб чиқишда Президентликка номзодлар кўрсатган сиёсий партиялардан биттадан кузатувчи қатнашиш ҳуқуқига эга. Бинобарин, сайловда сиёсий партия кузатувчисининг иштирок этиши, унинг ваколати доирасидаги вазифаларни қонундан оғишмаган ҳолда бажариши сайловнинг адолатли, очиқ ва ошкора ўтишига хизмат қилади. Бу ҳақда «Халқ сўзи» газетаси хабар бермоқда.
Марказий сайлов комиссиясининг шу йил 7 октябрда қабул қилинган қарорига асосан, Ўзбекистон Республикаси Президенти сайловида қатнашувчи сиёсий партияларнинг кузатувчилари тўғрисидаги низом тасдиқланди. Унга кўра, кузатувчининг асосий вазифаси сайловга тайёргарлик кўриш ва уни ўтказишга доир тадбирларда партия манфаатларини кўзлаб, сайлов қонунчилигига тўлиқ риоя этилиши устидан жамоатчилик назоратини амалга оширишдан иборат.
Муайян сиёсий партиянинг аъзоси, унинг тарафдори ёхуд мазкур сиёсий партияга хайрихоҳ бўлган Ўзбекистон Республикасининг 18 ёшга тўлган фуқароси ушбу сиёсий партиядан кузатувчи сифатида иштирок этишга ҳақли.
Ҳозирги вақтда Ўзбекистон Республикаси Президентлигига номзод кўрсатган сиёсий партиялар ўз кузатувчилари таркибини шакллантирди. Дастлабки маълумотларга кўра, округ сайлов комиссиялари томонидан сиёсий партияларнинг 37 минг 500 нафарга яқин кузатувчиси рўйхатдан ўтказилиб, уларга мандатлар берилган. Сиёсий партиялар сайлов штаблари томонидан кузатувчиларининг сиёсий-ҳуқуқий билимларини янада юксалтириш бўйича амалий ишлар олиб борилмоқда.
Ўзбекистон «Миллий тикланиш» демократик партияси Марказий сайлов штаби томонидан онлайн тарзида ўтказилган республика ўқув семинари кузатувчиларнинг сайловда муносиб иштирок этишига бағишланди. Марказий сайлов комиссияси масъул ходимлари, Олий Мажлис Қонунчилик палатаси депутатлари, Адлия вазирлиги, Фуқаролик жамияти шаклланишини мониторинг қилиш мустақил институти мутахассислари ҳамда ҳудудий партия ташкилотлари раҳбарлари ва партия кузатувчилари қатнашган тадбирда миллий сайлов қонунчилигига киритилган ўзгартиш ҳамда қўшимчаларнинг мазмун-моҳияти атрофлича таҳлил қилинди.
Тадбиркорлар ва ишбилармонлар ҳаракати — Ўзбекистон Либерал-демократик партияси ҳам сайлов кампаниясининг энг муҳим палласида партия манфаатларини ҳимоя қилиш, овоз беришнинг қонун талабларига оғишмасдан ўтказилиши устидан жамоатчилик назоратини олиб бориш мақсадида ўз кузатувчилари салоҳиятини оширишга, билим ва кўникмаларини янада мустаҳкамлашга алоҳида эътибор қаратмоқда. Партия фаоллари орасидан 9 минг 335 нафар кузатувчи тайинланиб, округ сайлов комиссияларида рўйхатдан ўтказилди.
Ўзбекистон Халқ демократик партияси Марказий сайлов штаби ҳам кузатувчиларнинг сиёсий ва ҳуқуқий билимини ошириш, уларнинг ҳуқуқ ҳамда вазифаларини кенг тушунтиришга алоҳида эътибор қаратмоқда.
— Сайловларнинг очиқ ва ошкоралиги, шаффофлигини кафолатлашнинг муҳим омили саналган кузатувлар дастлабки ҳамда асосий даврга бўлинади, — дейди Ўзбекистон Халқ демократик партияси Марказий сайлов штаби раҳбари Р. Камилов. — Дастлабки кузатув даври сайлов кунига қадар бўлган жараённи қамраб олади. Бундан ташқари, кузатувчи томонидан округ ва участка сайлов комиссияларининг мажлисларида, сайловолди ташвиқоти вақтида ҳамда овоз беришдан бир кун олдин сиёсий партия манфаатларини ҳимоя қилиш мақсадида кузатув амалга оширилади. Участка сайлов комиссияси овоз бериш куни ўз ишини бошлаган пайтдан то сайлов натижалари ҳақидаги баённома имзоланиб, кузатувчи томонидан унинг нусхаси олингунга қадар бўлган вақт асосий кузатув даври ҳисобланади. Кузатувчиларимиз мана шу жараёнларда фаоллик ҳамда зийраклик кўрсатиши, партия манфаатларини ҳимоя қилиб, жамоатчилик назоратини самарали амалга ошириши зарур.
Ўзбекистон «Адолат» социал-демократик партияси ҳам сайловда кузатувчи институтидан самарали фойдаланишга алоҳида эътибор қаратмоқда. Хусусан, шу кунга қадар партиянинг 9 минг 335 нафар кузатувчиси округ сайлов комиссиялари томонидан рўйхатга олинди. Ҳозирги вақтда партия кузатувчиларини сайлов куни овоз бериш жараёнини кузатишга тайёрлаш юзасидан фаол иш олиб борилмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)