Тошкентда «Нефть ва газни қайта ишлаш, муқобил ёқилғи» мавзусида илмий-техник конференция ташкил этилди

Тошкентда «Ўзбекнефтгаз» миллий холдинг компанияси ва «Ўзлитинефтгаз» акциядорлик жамияти ҳамкорлигида «Нефть ва газни қайта ишлаш, муқобил ёқилғи» мавзусида илмий-техник конференция ташкил этилди. Бу ҳақда ЎзА хабар бермоқда.

Тадбирда мамлакат нефть қазиб олиш ва қайта ишлаш корхоналари ходимлари, олимлар, мутахассислар, вазирлик ва идоралар вакиллари иштирок этди.

Конференцияда Ўзбекистонда газни қайта ишлаш ва газ-кимё соҳасининг бугунги ҳолати ҳамда истиқболда ривожлантириш, углеводород хом ашёсини чуқур қайта ишлаш асосида рақобатбардош маҳсулот ишлаб чиқариш ва бошқа долзарб масалалар юзасидан маърузалар тингланди. Биогаз, биоэтанол ва электр энергияси олиш бўйича янги технологиялар намойиш этилди. Нефтни қайта ишлаш асосида импорт ўрнини босадиган турли материаллар ишлаб чиқариш ва нефть-газ соҳасига замонавий технологияларни жорий қилиш имкониятлари тадбир иштирокчилари эътиборига ҳавола этилди.

Илмий-техник конференцияда соҳа мутахассислари ўзаро тажриба ва фикр алмашди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.