«Аргументи и факти»: Президент сайлови Ўзбекистон ва унинг халқи ҳаётида фавқулодда муҳим аҳамиятга эга

Россиядаги оммавий нашрлардан бири — «Аргументи и факти» газетасининг шу йил 24 ноябрда чоп этилган Ўзбекистон келажакни танламоқда номли мақолада мамлакатда юз бераётган ўзгаришлар, хусусан, 4 декабрда ўтказиладиган Ўзбекистон Президенти сайлови ҳақида сўз боради. Мақолада, жумладан, бўлажак сайловнинг қуйидаги хусусиятларига эътибор қаратилган.

«Президентлик институти Ўзбекистон давлат бошқаруви тизимида ўта муҳим ўрин тутади. Президент давлат бошлиғи ҳисобланади ва давлат ҳокимияти органларининг келишилган ҳолда фаолият юритиши ҳамда бир-бири билан ўзаро мувофиқлашувини таъминлайди. Ҳуқуқ ва эркинликлар, мамлакат Конституцияси ҳамда қонунларига риоя этилиши кафолати саналади.

Шу боис 4 декабрда бўлиб ўтадиган Президент сайлови Ўзбекистон ва унинг халқи ҳаётида фавқулодда муҳим аҳамиятга эга ижтимоий-сиёсий воқеа ҳисобланади.

Ўзбекистон Республикаси Конституцияси миллий сайлов тизими фаолияти ва жамият ҳаётининг барча соҳалари демократик тарзда ривожланиши учун асосий ҳужжат бўлиб хизмат қилади. Шунингдек, давлат раҳбари сайлови жараёнини тартибга солувчи норматив актлар қабул қилинган. «Ўзбекистон Республикаси Президенти сайлови тўғрисида», «Фуқароларнинг сайлов ҳуқуқи кафолатлари тўғрисида», «Ўзбекистон Республикаси Марказий сайлов комиссияси тўғрисида» ва бошқа қонунлар шулар жумласидандир.

Ушбу йўналишда қабул қилинган норматив-ҳуқуқий актлар фуқароларнинг овоз бериш ҳуқуқига сўзсиз риоя этилиши, сайловларда эмин-эркин иштирок этиши учун зарур шароитлар яратилиши, сайлов кампанияси чоғида сиёсий партиялар ва Президентликка номзодлар учун тенг имкониятлар берилишини таъминлашга қаратилган.

Жисмоний имконияти чекланган кишиларга қулай шароит яратиш мақсадида ҳар бир сайлов участкаси ногиронлик аравачалари учун пандуслар билан жиҳозланмоқда. Кабиналардан бири ҳам ногиронларга мўлжалланган. Кўзи ожизлар учун Брайл алифбосида сайловга оид қўлланмалар тайёрланмоқда. Илк бор улар учун махсус сайлов бюллетенлари тақдим этилади.

Ўзбекистоннинг ҳар бир фуқаросига унинг сайлов ҳуқуқи суд томонидан ҳимоя қилиниши, сайлов комиссиялари, давлат органлари, мансабдор шахслар, жамоат бирлашмаларининг ноқонуний ҳаракатлари юзасидан судга шикоят этиш имконияти кафолатланган. Фуқароларнинг сайлаш ва сайланиш ҳуқуқини чеклаш, бунга тўсқинлик қилиш қонунчиликка биноан жавобгарликка олиб келади.

Сайлов кампанияси очиқ-ошкоралик ва шаффофлик тамойиллари асосига қурилган. Мазкур жараёнда аёлларнинг фаоллигини ошириш, уларнинг ҳуқуқ ва манфаатларини ҳимоя қилишга алоҳида эътибор берилган. Шунингдек, Марказий сайлов комиссияси томонидан тасдиқланган тадбирлар дастурида нодавлат-нотижорат ташкилотларига ҳам муҳим ўрин берилган. Жамоат ташкилотлари инсоннинг энг асосий ҳуқуқларидан бири — сайлов ҳуқуқини ҳимоя қилиш, адолатли, эркин, очиқ ва ҳалол сайловлар ўтказиш учун ўз ҳиссасини қўшишга ҳаракат қилмоқда.

Шу тариқа, Ўзбекистонда мустақиллик йилларида яратилган давлат бошқаруви, демократик институтлар ва миллий қонунчилик тизими самарали фаолият кўрсатаётгани ва келажакка ишонч билан қарашга имкон беришини қайд этиш мумкин».

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.