Ўзбекистон касаба уюшмалари Федерациясида Халқаро молия корпорациясининг (IFC) ижтимоий масъулиятли ва экологик барқарор пахта етиштириш лойиҳасини амалга ошириш Режаси муҳокамаси бўлиб ўтди. Бу ҳақда «Дарё»га Федерация матбуот хизмати маълум қилди.
IFC вакиллари ўзбек томонини ижтимоий масъулиятли ва экологик барқарор пахта етиштириш лойиҳасини амалга ошириш режаси мақсад ҳамда вазифалари ҳақида хабардор қилди. Жумладан, Ўзбекистонда Better Cotton Initiative (BCI) талабларига жавоб берадиган пахта етиштириш учун барқарор бизнес-модель яратиш ҳам мазкур Режа йўналишларидан бири ҳисобланади.
BCI — пахта етиштириш услубларини яхшилаш, хусусан, пахтачиликнинг экология ва инсон саломатлигига таъсирини камайтиришга чақирувчи халқаро нотижорат ташкилоти. H&M, Levi’s, Adidas, Nike ва бошқа машҳур брендлар BCI дастури асосида етиштирилган пахта хом ашёсини сотиб олади.
Халқаро молия корпорация вакилларининг фикрича, BCI услубидан фойдаланиш ўзбек фермерларига таннархни пасайтирган ҳолда пахта етиштириш ҳажмини ошириш, текстиль ишлаб чиқарувчиларига эса жаҳон бозорида ўз мавқеларини мустаҳкамлаш имконини беради.
Ўзбек томони мазкур Режани янада такомиллаштириш юзасидан бир қатор таклифларни билдирди. Жумладан, пахта етиштириш технологик картасини ишлаб чиқиш, тегишли мутахассисларни тизимли ўқитиш, лойиҳани амалга ошириш жараёнини автоматлаштириш, қайта алоқа механизмини ташкиллаш, шерик тариқасида Қишлоқ ва сув хўжалиги вазирлиги, Ўзбекистон фермерлар кенгашини жалб этиш, лойиҳа учун танлаб олинадиган фермерлар гуруҳларини халқаро меҳнат стандартларига ўргатиш ва бошқа масалаларда Ўзбекистон касаба уюшмалари Федерацияси салоҳиятидан фойдаланиш таклиф қилинди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)