Ўзбекистон Республикаси Президентлигига «Адолат» социал-демократик партиясидан номзод Наримон Умаров сайловолди ташвиқоти доирасидаги навбатдаги учрашувини 9 ноябрь, чоршанба куни Бухоро вилояти сайловчилари билан ўтказди. Очиқ ва жонли мулоқот тарзида ташкил этилган тадбирда асосий учрашув жойи ҳамда туман, шаҳарлардан жами 2600 нафардан ортиқ сайловчи қатнашди. Бу ҳақда «Дарё»га партия матбуот хизмати хабар берди.
Учрашувни Ўзбекистон «Адолат» СДП Бухоро вилояти Кенгаши раиси ўринбосари Д.Ҳамдамова олиб борди. Наримон Умаровнинг ишончли вакили, халқ депутатлари Бухоро вилоят Кенгаши депутати, вилоят партия Кенгаши раиси А.Турсунов йиғилганларни Президентликка номзоднинг таржимаи ҳоли билан таништирди.
Наримон Умаров ўз чиқишида ҳар бир фуқаро қобилияти ва малакасидан келиб чиққан ҳолда меҳнат қилиши кафолатланадиган, меҳнатининг миқдори ва сифатидан келиб чиққан ҳолда муносиб иш ҳақи ва ҳаёт даражасига эришиши учун кенг ва тенг имкониятлар яратилган ижтимоий давлат қуриш учун курашишини маълум қилди.
Номзод Бухоро вилоятининг табиий иқлим шароити, ер ва сув ресурсларининг шўрланиш даражаси юқорилигини инобатга олган ҳолда ҳудудда тиббий хизмат даражаси ва сифатини янада ошириш зарурлигига эътибор қаратди. Шу билан бирга, мактаб ва мактабгача таълим муассасаларида болаларни тиббий хизматлар билан таъминлаш тизимини кучайтириш, дори воситаларининг ноқонуний айланиши, қалбакилаштирилган ва сифатсиз дори воситалари сотилишининг олдини олиш масалалари алоҳида қайд этилди.
Н.Умаровнинг бугунги кунда аҳоли ўртасида талаб ошиб бораётган тиббий муолажалар, хусусан, трансплантология, экстракорпорал уруғлантириш ва бошқа замонавий тиббий хизматларга рухсат бериш, хорижнинг етук тиббиёт марказлари билан ҳамкорлик ўрнатиш, чет эл врачларини Ўзбекистоннинг тиббий муассасаларида жарроҳлик операциялари ўтказиш амалиётини кенгайтириш, уларни доимий асосда ишга таклиф қилиш орқали миллий мутахассислар малакасини оширишга доир таклифлари сайловчилар томонидан қўллаб-қувватланди.
Президентликка номзод учрашув иштирокчиларининг ўз сайловолди дастури, ҳудудни ва республикани ривожлантиришга доир кўплаб саволларига жавоб қайтарди.
Тадбирда Олий Мажлис Қонунчилик палатаси депутати Қ. Жўраев, Бухоро давлат тиббиёт институти кафедра мудири И. Абдулҳақов, вилоят статистика бошқармаси бошлиғи Б. Ғиясов, Бухоро шаҳридаги 39-умумтаълим мактаби ўқитувчиси Ш.Мадиева, Ўзбекистон «Адолат» СДП Вобкент туман Кенгаши раиси М.Ҳомидов ва бошқалар сўзга чиқди.
Изоҳ (0)