Жорий йилнинг 9 ойи давомида солиқ идораларига 6 мингдан ортиқ мурожаат келиб тушди. Мурожаатларнинг қарийб 36 фоизи Ягона интерактив давлат хизматлари портали орқали электрон шаклда келган. Бу ҳақда Давлат солиқ қўмитаси қўмитаси ахборот хизмати маълум қилди, дея хабар беради ЎзА.
Мурожаатларни тезкор қабул қилиш ва зудлик билан тегишли чоралар кўрилишини таъминлаш мақсадида, Давлат солиқ қўмитаси, солиқ бошқармалари ва инспекцияларида жорий этилган «ишонч телефонлари»нинг узлуксиз ишлаши йўлга қўйилган. Бу тизим орқали 800 га яқин мурожаат тушди. Уларнинг аксариятини савдо ва хизмат кўрсатиш шохобчаларида савдо қоидаларининг бузилганлиги, тўловларни пластик карточкалар орқали амалга оширишдаги муаммолар билан боғлиқ масалалар ташкил этган.
Тошкент шаҳрида яшовчи Муборак Мадраҳимова Олмазор туманида жойлашган «Муслима Файз барака» савдо мажмуасидан сантехника маҳсулотлари сотиб олмоқчи бўлганида унга дўкон ходими пластик карточка орқали савдо қилмаслигини билдирган. Фуқаро бу ҳақда Тошкент шаҳар давлат солиқ бошқармаси «ишонч телефони»га мурожаат қилди. Унинг мурожаати бозорда фаолият олиб борувчи солиқ инспекторлари кўмагида жойида ҳал этилиб, М.Мадраҳимовага зарур маҳсулотлар ҳақи терминал орқали қабул қилинди.
Навоий вилояти давлат солиқ бошқармаси «ишонч телефони»га «Наргиза» хусусий корхонасига қарашли хусусий дўконда харидорларга амалга оширган савдоси учун харид чеки берилмаётгани баён қилинган. Мазкур ҳолат юзасидан давлат солиқ хизмати органлари томонидан ўтказилган текшириш давомида дўкон сотувчиси ноқонуний равишда 100 АҚШ доллари миқдорида хорижий валютада савдо қилганлиги, савдодан тушган нақд пуллар назорат касса машинасидан ўтказилмаганлиги, бундан ташқари, ҳеч қандай ҳужжатсиз 700 минг сўмлик товар-моддий бойликлар борлиги аниқланган. Ушбу ҳолатлар бўйича хусусий корхонага тегишли тартибда қонуний чора кўрилди.
Бухоро вилояти давлат солиқ бошқармаси «ишонч телефони»га Жондор тумандаги Пўлатли қишлоқ фуқаролар йиғини ҳудудида яширин равишда дорихона фаолияти йўлга қўйилгани ҳақида хабар келиб тушди. Мазкур мурожаат юзасидан давлат солиқ хизмати органлари ходимлари томонидан ўтказилган назорат тадбирларида ўз уйида аҳолига ноқонуний дори-дармонлар сотаётган фуқаро аниқланди. Ушбу ҳолат юзасидан тегишли ҳужжатлар расмийлаштирилиб, ноқонуний дорихонадан 168 турдаги дори-дармон маҳсулотлари далилий ашё сифатида олиб қўйилди.
Солиқ тўловчиларнинг энг кўп учрайдиган саволларига жавоблар тақдим этиш орқали уларнинг давлат солиқ хизмати органларига бевосита мурожаатларини қисқартириш, мурожаат этувчиларнинг вақтини тежаш ҳамда солиқ солиш қонунчилиги борасидаги ҳуқуқий маданиятини янада оширишга ёрдам бериш мақсадида, Давлат солиқ қўмитаси томонидан «Кўп учрайдиган саволлар» электрон давлат хизмати жорий этилган. Бугунги кунда ушбу хизматга 3 мингдан ортиқ савол ва жавоб жойлаштирилди.
Изоҳ (0)