O‘zbekiston Respublikasi Prezidentligiga “Adolat” sotsial-demokratik partiyasidan nomzod Narimon Umarov saylovoldi tashviqoti doirasidagi navbatdagi uchrashuvini 9-noyabr, chorshanba kuni Buxoro viloyati saylovchilari bilan o‘tkazdi. Ochiq va jonli muloqot tarzida tashkil etilgan tadbirda asosiy uchrashuv joyi hamda tuman, shaharlardan jami 2600 nafardan ortiq saylovchi qatnashdi. Bu haqda “Daryo”ga partiya matbuot xizmati xabar berdi.
Uchrashuvni O‘zbekiston “Adolat” SDP Buxoro viloyati Kengashi raisi o‘rinbosari D.Hamdamova olib bordi. Narimon Umarovning ishonchli vakili, xalq deputatlari Buxoro viloyat Kengashi deputati, viloyat partiya Kengashi raisi A.Tursunov yig‘ilganlarni Prezidentlikka nomzodning tarjimai holi bilan tanishtirdi.
Narimon Umarov o‘z chiqishida har bir fuqaro qobiliyati va malakasidan kelib chiqqan holda mehnat qilishi kafolatlanadigan, mehnatining miqdori va sifatidan kelib chiqqan holda munosib ish haqi va hayot darajasiga erishishi uchun keng va teng imkoniyatlar yaratilgan ijtimoiy davlat qurish uchun kurashishini ma’lum qildi.
Nomzod Buxoro viloyatining tabiiy iqlim sharoiti, yer va suv resurslarining sho‘rlanish darajasi yuqoriligini inobatga olgan holda hududda tibbiy xizmat darajasi va sifatini yanada oshirish zarurligiga e’tibor qaratdi. Shu bilan birga, maktab va maktabgacha ta’lim muassasalarida bolalarni tibbiy xizmatlar bilan ta’minlash tizimini kuchaytirish, dori vositalarining noqonuniy aylanishi, qalbakilashtirilgan va sifatsiz dori vositalari sotilishining oldini olish masalalari alohida qayd etildi.
N.Umarovning bugungi kunda aholi o‘rtasida talab oshib borayotgan tibbiy muolajalar, xususan, transplantologiya, ekstrakorporal urug‘lantirish va boshqa zamonaviy tibbiy xizmatlarga ruxsat berish, xorijning yetuk tibbiyot markazlari bilan hamkorlik o‘rnatish, chet el vrachlarini O‘zbekistonning tibbiy muassasalarida jarrohlik operatsiyalari o‘tkazish amaliyotini kengaytirish, ularni doimiy asosda ishga taklif qilish orqali milliy mutaxassislar malakasini oshirishga doir takliflari saylovchilar tomonidan qo‘llab-quvvatlandi.
Prezidentlikka nomzod uchrashuv ishtirokchilarining o‘z saylovoldi dasturi, hududni va respublikani rivojlantirishga doir ko‘plab savollariga javob qaytardi.
Tadbirda Oliy Majlis Qonunchilik palatasi deputati Q. Jo‘rayev, Buxoro davlat tibbiyot instituti kafedra mudiri I. Abdulhaqov, viloyat statistika boshqarmasi boshlig‘i B. G‘iyasov, Buxoro shahridagi 39-umumta’lim maktabi o‘qituvchisi Sh.Madiyeva, O‘zbekiston “Adolat” SDP Vobkent tuman Kengashi raisi M.Homidov va boshqalar so‘zga chiqdi.
Izoh (0)