Ўзбекистон Республикаси президентлигига ЎзХДПдан кўрсатилган номзод Ҳотамжон Кетмонов Хоразм вилояти сайловчилари билан учрашди. Вилоят Маънавият ва маърифат маркази мажлислар залида бўлиб ўтган учрашув бир вақтнинг ўзида вилоятнинг барча туманларидаги сайловчилар билан видео-конференция шаклида ташкил этилди. Бу ҳақда «Дарё»га партия матбуот хизмати маълум қилди.
Тадбирни Ўзбекистон Республикаси Олий Мажлиси Қонунчилик палатаси депутати Абдуғаффор Қирғизбоев очди ва олиб борди. Номзоднинг ишончли вакили Раимберган Сабуров Ҳотамжон Кетмоновнинг таржимаи ҳоли билан йиғилганларни таништирди.
Ўзбекистон Республикаси Президентлигига номзод сайловолди дастурининг асосий йўналишлари юзасидан йиғилганларга батафсил маълумот берди. Жумладан, кичик бизнес, уй меҳнати, касаначилик ва оилавий тадбиркорликни янада ривожлантириш орқали хотин-қизлар бандлигини таъминлаш самарадорлигини ошириш, меҳнат қонунчилигида аёлларга берилган ҳуқуқ ва қўшимча имтиёзлардан кенг фойдаланишлари учун янада мақбул шароитларни яратиш, меҳнатга лаёқатли аҳолини иш билан таъминлаш зарурлигини таъкидлади.
Шунингдек, бир марталик вақтинча иш билан банд шахслар меҳнат фаолиятининг қонуний асосларини такомиллаштириш, уларнинг пенсия таъминоти ва ижтимоий суғуртаси билан боғлиқ масалаларни ҳал қилишнинг меъёрий-хуқуқий асосларини ишлаб чиқиш ва амалиётга киритиш, турли имтиёзлар бериш орқали иш берувчи ва ходим ўртасидаги норасмий меҳнат муносабатларини қонунчиликка киритиш, меҳнат муҳофазаси қоидаларини бузганлик учун тадбиркорларнинг масъулияти ва жавобгарлигини ошириш ҳақида тўхталди.
Маъруза юзасидан бир қатор иштирокчилар сўзга чиқди. Улар ўз чиқишларида номзод дастурида илгари сурилаётган кучли ижтимоий сиёсатни амалга оширишда давлатнинг тартибга солувчанлик ролини мустаҳкамлаш, етакчи ижтимоий соҳаларнинг тижоратлашувини чеклаш, аҳолининг ижтимоий ҳимояга муҳтож қатлами вакилларига имтиёзлар белгилаш ва қўллаш тартибини ишлаб чиқиб, ҳаётга татбиқ этиш, унинг ижросини жамоатчилик, депутатлик назоратига олиш масаласини қўллаб-қувватлади.
Изоҳ (0)