Эстония бош вазири Таави Рийвас мухолифат ҳамда икки ҳукмрон партиянинг ихтиёрий равишда лавозимдан кетиш талабини бажаришдан бош тортишини маълум қилди. Бу ҳақда «Интерфакс» хабар бермоқда.
«Бу коалициянинг ҳамкорлиги тугагани мутлақо равшан», — деди у ўзи раҳбарлик қилаётган учинчи ҳукмрон партия — Ислоҳотлар партияси йиғилишида.
У ҳукумат бирор ишни хато қилди деб ҳисобловчилар билан баҳсга киришишга тайёрлигини айтиб ўтди:
«Шу боис имкон қадар тезроқ, эртагаёқ ишонмаслик бўйича овоз бериш ўтказилишини хоҳлайман, у ерда мен баёнот билан чиқаман».
7 ноябрь, душанба куни мамлакатдаги уч ҳукмрон партиядан иккитаси — Социал-демократик партия ҳамда Ота юрт — Республика иттифоқи Рийвасга ўз ихтиёри билан бош вазирликдан воз кечишни таклиф қилди. Ўша куни парламентдаги учала мухолиф партия фракциялари ҳам шу талаб билан чиқди. Парламент раҳбариятига Рийвасга нисбатан ишончсизлик вотуми чиқариш бўйича баёнот тақдим этилди.
Бош вазир ҳамда у раҳбарлик қилаётган Ислоҳотлар партиясининг рақиблари мамлакатдаги иқтисодий стагнация, маъмурий ислоҳот ва маҳаллий ўзини ўзи бошқариш органлари ислоҳотларининг амалга ошмагани, солиқ ва иқтисодиёт соҳасидаги сиёсат туфайли норозилик билдирмоқда.
Изоҳ (0)