Покистоннинг Билужистон вилоятидаги Гадани шаҳрида жойлашган кемаларни утилизация қилиш заводида рўй берган портлаш ва кучли ёнғин қурбонлари сони 26 кишини ташкил этмоқда. Бу ҳақда 6 ноябрь, якшанба куни маҳаллий расмийлар вакиллари маълум қилди, деб хабар беради «ТАСС».
Ҳодиса оқибатида 50 дан ортиқ киши жароҳатланди, улардан айримларининг ҳолати оғир эканлиги айтилмоқда. Портлаш чоғи темир-терсакка ажратиш учун қирқилаётган кемада 100 дан ортиқ киши ишлаётганди.
Эски кемаларни утилизация қилиш бўйича катталиги жиҳатидан дунёда иккинчи ўринда турадиган заводдаги портлаш 1 ноябрь, сешанба куни содир бўлди. Кемалардан бирида қолган ёқилғи газ пайвандлаш асбоби қўлланиши туфайли аланга олди. Полицияга кўра, завод ҳудудида жами саккизта портлаш рўй берди.
Покистон бош вазири Навоз Шариф фожиа тафсилотларини ўрганиш учун махсус комиссия тузишни топширди.
Изоҳ (0)