26 октябрь куни Ўзбекистон Президенти вазифасини бажарувчи Шавкат Мирзиёевнинг Туркманистон Президенти Гурбангули Бердимуҳамедов билан телефон орқали суҳбати бўлиб ўтди. Бу ҳақда ЎзА хабар бермоқда.
Шавкат Мирзиёев Гурбангули Бердимуҳамедовни Туркманистон мустақиллигининг 25 йиллиги муносабати билан чин дилдан табриклади ҳамда унга фаолиятида янги муваффақиятлар, биродар Туркманистон халқига эса тинчлик-хотиржамлик ва юксалиш тилади.
Ўз навбатида, Туркманистон Президенти Гурбангули Бердимуҳамедов илиқ табриклар учун самимий миннатдорлик билдириб, биродар Ўзбекистон халқига тинчлик, осойишталик ва гуллаб-яшнашни тилаб қолди.
Суҳбат асносида тарихан қисқа муддатда биродар Туркманистон пухта ўйланган кенг миқёсли социал-иқтисодий ислоҳотлар ва ижтимоий-сиёсий ўзгаришлар стратегияси туфайли истеъдодли ва меҳнатсевар туркман халқининг фаровонлиги ошиши ва маънавий янгиланишини, халқаро миқёсда мамлакат нуфузининг ошишини таъминлаш ишида юқори марраларга эришгани таъкидланди.
Суҳбат чоғида Ўзбекистон ва Туркманистон раҳбарлари, шунингдек, яқинда бўлиб ўтган турли даражадаги икки томонлама учрашувларда эришилган сиёсий-дипломатик, савдо-иқтисодий, транспорт-коммуникация, маданий-гуманитар ва бошқа йўналишлардаги ўзаро манфаатли ҳамкорликни янада кенгайтиришга қаратилган келишувлар реализациясини муҳокама қилди.
Икки давлат раҳбарлари икки томонлама кун тартиби ҳамда долзарб халқаро муаммолар бўйича ривожланиб бораётган, ўзаро ишончга асосланган ва очиқ Ўзбекистон–Туркманистон мулоқотини икки халқ равнақи, шунингдек, Марказий Осиё минтақасидаги хавфсизлик ва барқарорлик йўлида изчил давом эттиришга қатъий тайёрлигини тасдиқлади.
Изоҳ (0)