Перуда жодугарликда айбланган аёл тириклайин ёқиб юборилди. Бу ҳақда 27 сентябрь куни Associated Press агентлиги маълум қилди.
Пуэрто-Бермудес ҳудуди прокурори Уго Маурисионинг сўзларига қараганда, ҳодиса мамлакатнинг марказий қисмида, Амазонка водийсидаги тропик ўрмонларда яшовчи Ширингамату Алто жамоасида юз берган.
Ҳиндулар 73 ёшли Роза Вильяр Харионикани одамларга кинна киритишда гумон қилиб, уни ёқиб юбориш орқали ўлим жазосига ҳукм қилди. Аёлнинг тақдири ҳақидаги қарор 40 киши қабул қилди, кўпчилик унинг қатл этилишини ёқлаб чиқди.
Хариониканинг қўллари боғланиб, атрофи қуруқ шохлар билан ўралган, шундан сўнг устидан бензин қуйилиб, ёқиб юборилган. Юз бераётган ҳодиса мобил телефонга тасвирга олинган, видео қурбоннинг бақираётганини эшитиш мумкин.
Маурисионинг сўзларига қараганда, жамоа аъзолари далилларни йўқотиш учун яна уч кун жасадни гулханда ёққан. Бироқ ҳодиса жойига етиб келган полиция бир нечта суякни топган.
Изоҳ (0)