The Telegraph нашри футбол бўйича Англия термаси устози Сэм Эллардайснинг коррупцияга алоқадорлигини фош қилди

Британиянинг The Telegraph нашри томонидан уюштирилган ҳамда Англия футболида коррупция ва порахўрлик далилларини топишга қаратилган 10 ойлик махсус суриштирувда футбол бўйича Англия терма жамоаси бош мураббийи Сэм Эллардайс коррупцияга алоқадорлиги фош этилди. Бу ҳақда «ТАСС» хабар бермоқда.

Ўзини осиёлик бизнесменлар деб таништирган The Telegraph журналистлари Эллардайс билан музокарада иштирок этди.

61 ёшли мутахассис ўз лавозими ва алоқаларидан фойдаланиб, «бизнесменлар»га Англия клублари трансферларидан даромад олишга ёрдам беришга рози бўлди. Ўз навбатида, мураббий ёрдами учун 400 минг фунт стерлинг сўради.

Бундан ташқари, Эллардайс Англия футбол ассоциацияси (FA)нинг ўйинчилар трансферидан учинчи шахсларга футболчининг ҳуқуқига эга бўлишни тақиқловчи қоидаларни четлаб ўтиш йўллари ҳақида сўзлаб берди.

The Telegraph ходимлари суриштирув ишини батафсил ёритган ҳолда FA’га хат кўринишида юборди. Англия футбол уюшмаси вакили ушбу иш юзасидан тўлиқ ҳисобот ва музокаралар таҳлилини тақдим қилишни сўради. Sky Sports телеканали FA Сэм Эллардайсга нисбатан суриштирув бошлаганини маълум қилди.

Маълумот учун, Сэм Эллардайс Англия терма жамоасига бош мураббий этиб тайинланишидан аввал «Сандерленд» клубида фаолият олиб борган.

Мураббийлик фаолияти давомида у «Вест Хем», «Блекберн», «Ньюкасл» ва «Болтон» сингари инглиз клубларида ҳам ишлаган.