Россия президенти Владимир Путин биринчи марта Bloomberg агентлиги версиясига кўра дунёнинг 50 нафар энг нуфузли кишилари рейтингига киритилди, деб ёзади «Ведомости». У рўйхатда 30-ўринни эгаллади.
«Путин санкциялар ҳамда ёқилғи манбаларининг нархи пасайиб кетиши юзасидан унчалик кўп хавотир кўрсатгани йўқ… Бутун дунё Россия президенти бундан кейин нима қилишини кутмоқда, унинг ҳаракатлари иқтисодий ва молиявий беқарорликка олиб келиши, нефтга, Шарқий Европадаги чегарадош мамлакатларга, Яқин Шарққа ва, эҳтимол, ҳаттоки АҚШ президентлигига сайловларга ҳам таъсир ўтказишидан бироз хавфсирамоқда», — дейилади Bloomberg хабарида.
Рейтингда Путиндан бошқа россияликлар йўқ. Рўйхатда Буюк Британия бош вазири Тереза Мэй етакчилик қилди. Иккинчи ўринни Республикачилар партиясидан АҚШ президентлигига номзод Дональд Трамп эгаллади. Юқори учликни Трампнинг Демократик партиядан рақиби Ҳиллари Клинтон якунлади.
Топ ўнталикка шунингдек, Хитой Халқ Республикаси раиси Си Цзиньпин, Amazon асосчиси ва раҳбари Жефф Безос, Германия канцлери Ангела Меркель, Европа марказий банки президенти Марио Драги, АҚШ Федерал захира тизими раҳбари Жанет Йеллен, Berkshire Hathaway бош директори Уоррен Баффет ва Бразилия федерал судьяси Сержио Моро кирди.
Изоҳ (0)