Жанубий Кореянинг Сеул миллий университети олимлари ўтган йил ёзида Ямал-Ненец автоном округидаги (Россия) археологик ёдгорликлардан бирида топилган XIII асрга мансуб мумиёланган бола юзини тикламоқда. Бу ҳақда округ ҳукумати матбуот хизматига таяниб, «ТАСС» хабар бермоқда.
«2015 йили ўрта асрларга оид қабристонда аниқланган боланинг мумиёланган қолдиқларини мукаммал тадқиқ этиш давом этмоқда. Ямал топилмасини ўрганишга Сеул миллий университети тадқиқотчилари қўшилди. Улар боланинг ирқий мансублигини аниқлаш, шунингдек, юзини тиклаш ниятида», — дея маълум қилди матбуот хизмати.
Ҳозирда Россия фанлар академияси молекуляр генетика институти олимлари мумиёланган қолдиқ геноми устида ишламоқда. Санкт-Петербургдаги тажриба тиббиёти институти ходимлари бола ҳаёт пайтида қандай касалликлар билан оғриганига аниқлик киритмоқда. Бу йил ҳам Ямалдаги қабристонда қазишмалар олиб борилди ва археологлар томонидан 8 қабр очилди ҳамда ўрганилди. Улардан бири аёл, иккиси болага тегишли.
Изоҳ (0)