Uber такси-сервиси 14 сентябрь куни синов тариқасида ҳайдовчисиз ҳаракатланувчи автомобилларни йўлга чиқарди. Ушбу хизмат ҳозирча фақат АҚШнинг Питтсбург шаҳрида йўлга қўйилган, шунда ҳам шаҳарни тўла қамраб олмаган. Шунга қарамай, бу жаҳоннинг кўплаб йирик корпорациялари изланишлар олиб бораётган ҳайдовчисиз автомобиллар оламидаги муҳим бор воқеадир. Етакчи технологик нашрларнинг мухбирлари Питтсбургдаги ҳайдовчисиз машиналарда сайр қилиб кўрди. Meduza нашри, уларнинг ҳисоботлари асосида, бундай автомобилдаги саёҳат қандай ҳиссиётлар тақдим этиши ҳақида ҳикоя қилди.
TechCrunch нашрининг ёзишича, Питтсбург шаҳри кўчаларига 14 та ҳайдовчисиз Ford Fusion автомобиллари чиқди. Уларнинг бари йўлдаги вазиятни кузатиб борувчи 20 тадан камера, шунингдек, автомобилга атрофдаги барча воқеа-ҳодисаларни «кўриш» имконини берувчи лидар билан таъминланган.
Ҳайдовчисиз автомобиллардан ҳамма ҳам фойдалана олмайди. Business Insider’нинг ёзишича, Uber’нинг бундай машиналари «энг содиқ мижозларга» берилади, бироқ бундай мижозлар қандай саралаб олинишига аниқлик киритилмаяпти. Мобил дастур орқали таксига буюртма берилганида, мижозга у ҳайдовчисиз автомобилда кетиши маълум қилинади.
Аслида машиналар унчалик ҳам ҳайдовчисиз эмас. Йўловчилар фақат орқа ўриндиққа ўтириши мумкин, чунки олдинда Uber мутахассислари кетади. Бири — рулдагиси — ҳар эҳтимолга қарши рулни тутиб қолиши керак, иккинчиси — йўловчи ўриндиғидаги эса — машина ўзини қандай тутаётганини кузатиб боради.
Орқадаги йўловчиларнинг қаршисидаги планшетда сафар ҳақида ахборот, шунингдек, машина «кўраётган» манзара намойиш этиб турилади. Бундан ташқари, бу планшет ёрдамида селфига тушиш мумкин. The Verge журналисти Эндрю Хокинснинг ёзишича, «бу ишончни оширади». «Селфига тушиш имконини берувчи машинадан ким ҳам қўрқарди?!», — дейди у.
Business Insider журналистининг қайд этишича, умуман олганда бундай таксидаги сафар оддий таксидагидан фарқ қилмайди. Uber ходимининг қўли деярли ҳар доим рулда бўлгани сабаб, у ҳам вақти-вақти билан машина ўзи ҳаракатланаяптими-йўқми, текшириб туришга мажбур бўлган. Айни вақтда, машинанинг ўзи ҳам баъзида ҳайдовчи бошқарувни қўлга олиши лозимлигини билдириб турган (бундай ҳолатларнинг баъзилари оддий, текис йўлларда юз берган). Uber’нинг ҳайдовчисиз таксилари кўприкларда ҳам инсон ёрдамига муҳтож — атрофда бинолар йўқлиги сабаб, машина маконда мўлжал олишга қийналади (GPS бу масалада ҳозирча керакли аниқликни бера олмайди).
The Verge ходими ҳайдовчисиз автомобиль рулида ўзи сайр қилиб кўрди ва қўлини рулдан олмасликдан тийила олмади. Бироқ машина ҳозирча тўла мустақил ҳаракатлана олмаслигини қатъий билдириб турди. «Машина ўзи қанчалар яхши кетаётганига бир ҳайрон қолган бўлсам, айни вақтда, у тез-тез бошқарувни ҳайдовчига топшириб қўйишидан ҳам шунчалик ҳайратда қолдим», — деб ёзади у.
Эндрю Хокинс роботни оддий ҳайдовчидан ажратиб турувчи яна бир фарққа дуч келди. Олдиндаги йўлтанламас кескин тўхтаганида, Ford Fusion ҳам тезликни пасайтирган. Шундан сўнг йўлтанламаснинг ҳайдовчиси: «Ёнимдан ўтиб кетаверинглар», дея ишора қилган, бироқ ҳайдовчисиз Uber, турган гапки, бу ишораларни тушунгани йўқ.
TechCrunch’нинг хулосасига кўра, Uber’нинг бу тажрибаси ҳозирча кўпроқ тадқиқот ишига ўхшайди. Синовда компания ходимлари иштирок этмоқда, йўловчиларнинг ҳайдовчисиз машина ҳаракатларига муносабатини тушуниш учун эса улар видеога олинмоқда.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)