Mazda кузовнинг орқа эшигида аниқланган носозлик туфайли 2,2 миллионга яқин автомобилни чақириб олади. Бу ҳақда 8 сентябрь, пайшанба куни Япония автоконцернининг Америкадаги филиалида маълум қилинди, дея хабар беради «ТАСС».
Чақириб олиш 2013 йилда чиқарилган Mazda CX-3 ва Mazda CХ-5 компакт кроссоверлари, шунингдек, 2012—2015 йилларда чиқарилган Mazda 3 нинг айрим моделлари ва Mazda 5 минивэнларига тегишли бўлади. Улардан 760 мингга яқини Шимолий Америка бозорида сотилган.
Концернга кўра, мазкур машиналар бешинчи эшигидаги амортизаторлар зангдан яхши ҳимояланмаган ва ишдан чиқиши мумкин. Шу билан бирга, ҳозиргача ушбу нуқсон туфайли шикастланиш рўй бериши билан боғлиқ бирор ҳолат қайд этилмади. Mazda носозликни бепул бартараф этиши билдирилмоқда.