Глобал иқлим ўзгариши феноменининг ҳақиқийлиги тўғрисидаги мунозара тугади, бундай ҳодиса мавжудлигини шубҳа остига қўювчи скептиклар эса деярли қолмади. Бундай фикрни 4 сентябрь, якшанба куни БМТ бош котиби Пан Ги Мун G20 саммити очилиши арафасида Хитойнинг Ханчжоу шаҳрида бўлиб ўтган матбуот анжуманида билдирди, деб ёзади «ТАСС».
«Иқлим феномени ҳақидаги баҳс-мунозара тугади, бу илмий жиҳатдан исботланди. Бу (иқлимнинг ўзгариши) бизнинг кундалик ҳаётимизга таъсир қилади», — деди бош котиб.
У иқлим бўйича Париж битими АҚШ ва Хитой томонидан ратификация қилинганини маъқуллади. Атмосфера ҳарорати ошишининг асосий сабаби бўлган иссиқхона газларининг қарийб 38 фоизи ушбу икки мамлакат ҳиссасига тўғри келади. Унинг сўзларига кўра, Пекин ва Вашингтон узоқни ўйлаган ҳолда ва оқилона ҳаракат қилмоқда. «Улар одамлар учун ишламоқда, Ер сайёраси учун ишламоқда», — дея таъкидлади Пан Ги Мун.
АҚШ президенти Барак Обама ва ХХР раиси Си Цзиньпин Париж битимининг икки мамлакат томонидан ратификация қилингани ҳақидаги ҳужжатни Пан Ги Мунга 3 сентябрь, шанба куни топширди.
Иқлим бўйича Париж битими 2015 йил 12 декабрда Париждаги анжуман якунларига кўра қабул қилинган эди. Форумнинг 195 иштирокчиси 2100 йилгача сайёрадаги ўртача ҳароратни саноатгача бўлган даврдагига нисбатан Цельсий бўйича 2 даражадан кўпроқ ошишига йўл қўймасликка келишиб олган эди.
Изоҳ (0)