Global iqlim o‘zgarishi fenomenining haqiqiyligi to‘g‘risidagi munozara tugadi, bunday hodisa mavjudligini shubha ostiga qo‘yuvchi skeptiklar esa deyarli qolmadi. Bunday fikrni 4-sentabr, yakshanba kuni BMT bosh kotibi Pan Gi Mun G20 sammiti ochilishi arafasida Xitoyning Xanchjou shahrida bo‘lib o‘tgan matbuot anjumanida bildirdi, deb yozadi “TASS”.
“Iqlim fenomeni haqidagi bahs-munozara tugadi, bu ilmiy jihatdan isbotlandi. Bu (iqlimning o‘zgarishi) bizning kundalik hayotimizga ta’sir qiladi”, — dedi bosh kotib.
U iqlim bo‘yicha Parij bitimi AQSh va Xitoy tomonidan ratifikatsiya qilinganini ma’qulladi. Atmosfera harorati oshishining asosiy sababi bo‘lgan issiqxona gazlarining qariyb 38 foizi ushbu ikki mamlakat hissasiga to‘g‘ri keladi. Uning so‘zlariga ko‘ra, Pekin va Vashington uzoqni o‘ylagan holda va oqilona harakat qilmoqda. “Ular odamlar uchun ishlamoqda, Yer sayyorasi uchun ishlamoqda”, — deya ta’kidladi Pan Gi Mun.
AQSh prezidenti Barak Obama va XXR raisi Si Szinpin Parij bitimining ikki mamlakat tomonidan ratifikatsiya qilingani haqidagi hujjatni Pan Gi Munga 3-sentabr, shanba kuni topshirdi.
Iqlim bo‘yicha Parij bitimi 2015-yil 12-dekabrda Parijdagi anjuman yakunlariga ko‘ra qabul qilingan edi. Forumning 195 ishtirokchisi 2100-yilgacha sayyoradagi o‘rtacha haroratni sanoatgacha bo‘lgan davrdagiga nisbatan Selsiy bo‘yicha 2 darajadan ko‘proq oshishiga yo‘l qo‘ymaslikka kelishib olgan edi.
Izoh (0)