Сингапурда Зика вирусига чалинган 115 кишидан 40 нафари чет эллик – 21 хитойлик, 13 ҳиндистонлик ва 6 нафар Бангладеш фуқароси бўлган. Бу ҳақда 1 сентябрь, пайшанба куни Ҳиндистон Ташқи ишлар вазирлигининг расмий вакили Викас Сваруп маълум қилди, деб хабар бермоқда «ТАСС».
«13 нафар Ҳиндистон фуқаросининг Зика вирусига топширган тести ижобий чиққани ҳақида маълумотимиз бор. Сингапур соғлиқни сақлаш вазирлиги касалликка чалинганларнинг сони яна ошиши мумкинлигини хабар қилди», – деди Ҳиндистон расмий вакили.
Шу йилнинг 27 август кунидан бошлаб Сингапурда 115 кишида Зика вируси аниқланди. Сингапур соғлиқни сақлаш вазирлигининг маълум қилишича, касалликка чалинган аксарият чет элликлар қурилиш соҳасида ишлаган. Вазирликнинг қайд этишича, Зика вирусига чалинганлар мамлакатни тарк этмаган.
Эслатиб ўтамиз, Сингапурга бориб келган малайзиялик аёлда ҳам Зика вируси аниқланган ва бу Малайзияда ушбу касалликка чалинган биринчи ҳолат сифатида қайд этилган.
Изоҳ (0)