Эъзозхон Каримова 31 июль куни президент фармони билан мактабгача ва мактаб таълими вазири лавозимига тасдиқланди. Шу куни унинг номзоди Олий Мажлис Қонунчилик палатаси депутатлари томонидан маъқулланганди.
Эъзозхон Каримова 2025 йил 7 майдан буён мактабгача ва мактаб таълими вазири ўринбосари — Низомий номидаги Ўзбекистон миллий педагогика университети ректори лавозимида ишлаб келаётганди. У бунга қадар Ихтисослаштирилган таълим муассасалари агентлиги директорининг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш масалалари бўйича маслаҳатчиси вазифасида фаолият юритган.
2021 йилда Президент, ижод ва ихтисослаштирилган мактабларни ривожлантириш агентлиги бўлими бошлиғи, 2021—2023 йилларда Президент таълим муассасалари агентлиги директори маслаҳатчиси лавозимларида ишлаган. 2023—2024 йилларда Мактабгача ва мактаб таълими вазирлиги тизимидаги “Янги Ўзбекистон” университетининг ёшлар масалалари ва маънавий-маърифий ишлар бўйича проректори вазифасида иш олиб борган.
Мактабгача ва мактаб таълими вазирлигига 2022 йил декабридан буён раҳбарлик қилиб келган Ҳилола Умарова 2025 йил 14 июль куни Президент администрацияси раҳбарининг таълимни ислоҳ қилиш бўйича ўринбосари лавозимига тайинланганди.
Изоҳ (0)