Сунъий интеллект соҳасида етакчи технология компаниялари билан рақобатлашишга интилаётган Apple корпорацияси юқори маошлар эвазига истеъдодли дастурчиларни ўзига жалб қилмоқда. Бу ҳақда Business Insider (BI) хабар берди.
Таъкидланишича, йирик технология компаниялари ўртасида сунъий интеллект соҳасидаги рақобатнинг кескин ўсиши фонида Apple кадрлар оқимига дуч келмоқда ва мутахассисларни сақлаб қолиш учун кўпроқ куч сарфлашга мажбур бўлмоқда. Сўнгги бир ой ичида Apple’нинг сунъий интеллект соҳасидаги тўртта етакчи тадқиқотчиси Меta’га ўтиб кетган. Бу эса тобора кучайиб бораётган “истеъдодлар жанги”нинг яна бир белгиси бўлди.
Ходимлар кетиб қолишига жавобан Apple сунъий интеллект моделларини ишлаб чиқиш билан шуғулланувчи Apple Foundation Моdels (АFМ) бўлими ходимларининг маошларини оширган. Шунингдек, компания мутахассислар сафини кенгайтирмоқда. Ҳозирда машинали ўқитиш ва сунъий интеллект билан боғлиқ юзлаб бўш иш ўринлари мавжуд.
Apple дастурчилар учун жозибадор иш берувчи бўлиб қолмоқда. Компания нафақат рақобатбардош иш ҳақи, балки акциялардан тортиб маҳсулотларга чегирмаларгача бўлган турли хил имтиёзларни ҳам таклиф этади. Масалан, машинали ўрганиш бўйича мутахассис йилига 329 минг долларгача, дастурий таъминот муҳандиси 378 минг доллар, фойдаланувчи интерфейси дизайнери 468 минг доллар, маълумотлар олими 322 минг доллар ва маълумотлар муҳандиси 234 минг доллар топиши мумкин.
Таъкидланишича, бу суммалар қўшимча тўловлар ва акциялар кўринишидаги мукофотларни ўз ичига олмайди. Булар эса компания ходимларининг умумий даромадини сезиларли даражада ошириши мумкин. Apple’даги маошларнинг тўлиқ рўйхати билан BI мақоласида танишиш мумкин.
Изоҳ (0)