Саудия Арабистонининг Риёд шаҳрида ўтказилаётган Esports World Cup Chess мусобақасида чорак финал баҳслари бошланди. Гуруҳ босқичидаги қийин ўтган беллашувлардан сўнг плей-офф йўлланмасини қўлга киритган Нодирбек Абдусатторов чорак финалда мусобақани тарк этди.
У мазкур босқичда франциялик Алиреза Фирузжага қарши дона сурди ва ҳар икки партияда ҳам мағлубиятга учради. Абдусатторов биринчи партияда вақт тугагани боис имкониятни бой берди, иккинчи ўйинда эса қўпол хатога йўл қўйгани учун ютқазиб қўйди.
Шу тариқа, Алиреза Фирузжа ярим финалга йўл олди. Нодирбек Абдусатторов эса мусобақадаги иштирокини якунлади. Ўзбекистонлик шахматчи бу турнирдаги натижаси эвазига 90 минг доллар пул мукофотини қўлга киритди.
Эслатиб ўтамиз, ушбу мусобақада бошқа бир ўзбекистонлик шахматчи — Жавоҳир Синдоров ҳам иштирок этган эди. У гуруҳ босқичида икки бор мағлубиятга учраб, мусобақани эрта тарк этди.
Esports World Cup мусобақасининг соврин жамғармаси 1,5 миллион долларни ташкил қилади. Ғолиб 250 минг доллар, иккинчи ўрин эгаси 180 минг доллар, учинчи ва тўртинчи ўрин эгалари эса 125 минг доллардан мукофот олади. 5–8-ўрин эгалари 90 минг, 9–12-ўринлар 65 минг, 13–16-ўринлар эса 50 минг доллар миқдорида мукофот пули билан тақдирланади.
Изоҳ (0)