АҚШ Германиянинг Россия билан қурол-яроғ устидан назорат ҳақида янги шартнома тузиш таклифига шубҳа билан қарамоқда. Бу ҳақда Reuters юқори мансабли дипломатга таяниб хабар берди, деб ёзади «РБК».
«Вашингтон Россия билан шаффофликни ошириш бўйича музокаралар давом эттирилишини ёқлаб чиқади, аммо ушбу босқичда қандайдир янги битимлар тузишдан эҳтиёт бўлади», — деди Европада хавфсизлик ва ҳамкорлик ташкилотидаги АҚШ элчиси Дэниел Байер.
Дипломат «Россия аввалроқ тузилган шартномаларни бузаётган бир вазиятда янги битимлар ҳақидаги ғояга алоҳида эҳтиёткорлик билан ёндашиш керак»лигини айтди.
Байер эслатишича, Россия Европадаги оддий қуролли кучлар тўғрисидаги шартномани амалга ошириш бўйича бирлашган маслаҳат гуруҳи учрашувларидаги иштирокини тўхтатди ҳамда 1992 йилги очиқ осмон ҳақидаги келишувга ва 1990 йилги ахборот алмашиш ва ҳарбий объектлар қўшма назорати ҳақидаги Вена битимига риоя қилмаяпти.
Ўтган ҳафта бу йил ЕХҲТ раиси лавозимини эгаллаб келаётган Германия ташқи ишлар вазири Франк-Вальтер Штайнмайер Россия билан қурол-яроғ устидан назорат ҳақида янги шартнома тузишни таклиф қилганди. У ЕХҲТнинг 57 аъзосидан 40 таси унинг таклифини муҳокама қилишга рози бўлганини айтди.
Изоҳ (0)