O‘zbekiston Vazirlar Mahkamasi qarori bilan Jasur Rizayev Toshkent davlat stomatologiya instituti rektori etib tayinlandi. Bu haqda “Xushnudbek.uz” xabar berdi.
Bungacha Jasur Rizayev Toshkent tibbiyot akademiyasi 3-klinikasi bosh shifokori hamda Toshkent vrachlar malakasini oshirish institutining 2-stomatologiya kafedrasi mudiri lavozimlarida ishlab kelayotgan edi.
Jasur Rizayev 1996-yil Toshkent davlat tibbiyot instituti (TDTI)ni tamomlagan. 1998—2000-yillarda katta laborant, 2000—2007-yillarda assistent, 2007—2008-yillarda 1-TDTIda dotsent, 2008—2011-yillarda Toshkent shahar Uchtepa tuman tibbiyot birlashmasida rahbar bo‘lib faoliyat yuritgan.
2011-yildan buyon Toshkent tibbiyot akademiyasi 3-klinikasi bosh shifokori, 2016-yildan esa Toshkent vrachlar malakasini oshirish institutining 2-stomatologiya kafedrasi mudiri lavozimlarida ishlagan. 2006-yilda tibbiyot fanlari nomzodligi uchun, 2016-yili tibbiyot fanlari doktorligi uchun dissertatsiyalarni himoya qilgan, 60 dan ortiq ilmiy ishlar muallifi.
Qayd etish joiz, Jasur Rizayev shifokorlik faoliyati bilan bir qatorda qo‘shiqlar ham kuylagan bo‘lib, uning “Ona yurt”, “Muhabbat sog‘inchi”, “Do‘st” kabi kompozitsiyalari mashhur.
Ma’lumot uchun, bungacha Toshkent davlat stomatologiya institutiga Nig‘mon Habilov rektorlik qilayotgan edi. U Vazirlar Mahkamasining 2014-yil 7-avgustdagi qaroriga muvofiq institut rektori etib tayinlangan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)