Францияда нархи қарийб бир миллиард еврога тенг дунёдаги энг қиммат вилла сотувга қўйилди, дея хабар бермоқда «Интерфакс» Франция халқаро радиосига таяниб.
Ницца яқинидаги Кап-Ферра ярим оролида жойлашган «Кедрлар» вилласи қачонлардир Бельгия қироли Леополд II га тегишли бўлган. Ҳозир эса у Grand Marnier ликёрини ўйлаб топган Marnier-Lapostolle оиласига қарашлидир.
Вилланинг ҳозирги нархи 2008 йилдагидан деярли икки баробар баландроқ. Ўшанда уни россиялик бизнесменлардан бири 370 миллион еврога (мебель учун қўшимча 19,5 миллион евро) харид қилмоқчи бўлган, аммо олди-сотди амалга ошмаган.
Виллада ўнлаб хоналар, меҳмонлар қабул қилинадиган зал, отхона, қишки боғ, хизматкорлар учун иморатлар, 50 метрли бассейн ҳамда 14 гектар майдонни эгаллаган ва иссиқхоналарида ноёб тропик ўсимликлар намуналари ўстириладиган ботаника боғи бор.
Изоҳ (0)