АҚШ расмийлари Суриядаги террорчилар базаларига авиазарбалар бериш учун Россия томонидан Эрондаги ҳарбий базанинг фойдаланилиши ўзини оқламайди деб ҳисоблайди. Давлат департаментига кўра, бу мамлакатдаги можарони бартараф этишга кўмак бермайди. Бу ҳақда Давлат департаменти матбуот хизмати бошлиғининг ўринбосари Марк Тонер маълум қилди, дея хабар беради «Ведомости».
«Бу ёрдам бермайди, чунки Алеппо ва унинг атрофидаги шундай ҳам ўта хавфли вазиятни мураккаблаштиришга сабаб бўлади. Шу билан бирга, Россия ва АҚШ Суриядаги можарони изга солиш учун кенг кўламли ҳамкорликни йўлга қўйиш имкониятини муҳокама этишда давом этмоқда», — дея таъкидлади Тонер.
Эслатиб ўтамиз, олдинроқ Эрон парламенти спикери Али Ларижоний мамлакат Россияга Сурияда ҳарбий операциялар ўтказиш учун ҳарбий база тақдим этмагани, балки террорга қарши курашда ҳамкорлик қилаётганини билдирганди.
Изоҳ (0)