АҚШнинг Қрим бўйича позицияси ўзгаришсиз қолмоқда, Россиянинг Киевни террорчиликда айблашга уринишлари эса асосий муаммо — босиб олинган ярим оролни Украинага қайтаришдан чалғитади, холос. Бу ҳақда Давлат департаменти матбуот котиби Элизабет Трюдо кундалик брифинг чоғида айтиб ўтди.
«Бизни нафақат Россиянинг Қримни босиб олиши балки Украина шарқида давом этаётган Россия тажовузидан иборат асосий муаммодан чалғитишларини истамаймиз», — деди у.
«Қрим бўйича фикримиз яхши маълум. Қрим Украинанинг бир қисми ва доим шундай бўлиб қолади. Биз Россиянинг Қрим устидан истилосини қоралаймиз ва у зудлик билан бас қилинишига чақирамиз. Россия ярим оролни Украинага қайтариб бермагунича, бизнинг Қрим аннексияси билан боғлиқ санкцияларимиз ўз ўрнида қолади», — дея таъкидлади Элизабет Трюдо.
Шу билан бирга, у, гўёки, Қримда олди олинган терактлар масаласида жавоблар олиш учун бевосита Украина ҳукуматига мурожаат қилишни маслаҳат берди.
Аввалроқ Россия президенти Владимир Путин АҚШ Украина масаласи ҳал этилишидан манфаатдор бўлса, Киевга таъсир ўтказишига умид қилаётганини билдирган эди.
Эслатиб ўтамиз, олдинроқ Россия федерал хавфсизлик хизмати (ФХХ) Қрим Республикаси ҳудудида Украина мудофаа вазирлиги разведка бош бошқармаси томонидан тайёрланган терактларнинг олди олинганини маълум қилди. Диверсантлар гуруҳини тутиш чоғида ФХХ ходими ва россиялик ҳарбий ҳалок бўлди.
Изоҳ (0)