AQShning Qrim bo‘yicha pozitsiyasi o‘zgarishsiz qolmoqda, Rossiyaning Kiyevni terrorchilikda ayblashga urinishlari esa asosiy muammo — bosib olingan yarim orolni Ukrainaga qaytarishdan chalg‘itadi, xolos. Bu haqda Davlat departamenti matbuot kotibi Elizabet Tryudo kundalik brifing chog‘ida aytib o‘tdi.
“Bizni nafaqat Rossiyaning Qrimni bosib olishi balki Ukraina sharqida davom etayotgan Rossiya tajovuzidan iborat asosiy muammodan chalg‘itishlarini istamaymiz”, — dedi u.
“Qrim bo‘yicha fikrimiz yaxshi ma’lum. Qrim Ukrainaning bir qismi va doim shunday bo‘lib qoladi. Biz Rossiyaning Qrim ustidan istilosini qoralaymiz va u zudlik bilan bas qilinishiga chaqiramiz. Rossiya yarim orolni Ukrainaga qaytarib bermagunicha, bizning Qrim anneksiyasi bilan bog‘liq sanksiyalarimiz o‘z o‘rnida qoladi”, — deya ta’kidladi Elizabet Tryudo.
Shu bilan birga, u, go‘yoki, Qrimda oldi olingan teraktlar masalasida javoblar olish uchun bevosita Ukraina hukumatiga murojaat qilishni maslahat berdi.
Avvalroq Rossiya prezidenti Vladimir Putin AQSh Ukraina masalasi hal etilishidan manfaatdor bo‘lsa, Kiyevga ta’sir o‘tkazishiga umid qilayotganini bildirgan edi.
Eslatib o‘tamiz, oldinroq Rossiya federal xavfsizlik xizmati (FXX) Qrim Respublikasi hududida Ukraina mudofaa vazirligi razvedka bosh boshqarmasi tomonidan tayyorlangan teraktlarning oldi olinganini ma’lum qildi. Diversantlar guruhini tutish chog‘ida FXX xodimi va rossiyalik harbiy halok bo‘ldi.
Izoh (0)