Туркия етакчиси Ражаб Тоййиб Эрдўғон Россия президенти Владимир Путин билан музокаралар ўтказиш учун 9 август, сешанба куни Санкт-Петербург шаҳрига келди. «Интерфакс» хабарига кўра, икки мамлакат раҳбарларининг учрашуви шаҳардаги Константин саройида бўлиб ўтади.
Хабар беришларича, икки президент ўртасида дастлаб тор доирада музокаралар бўлиб ўтади. Унда, шунингдек, Россия ташқи ишлар вазири Сергей Лавров ва унинг туркиялик ҳамкасби Мавлут Чавушўғли, Путиннинг ёрдамчиси Юрий Ушаков ва Эрдўғон маъмурияти бош котиби ўринбосари Иброҳим Калин иштирок этади. Шундан сўнг кенгайтирилган таркибда музокаралар ўтказилиши кўзда тутилган.
Қайд этиш жоиз, бу Эрдўғоннинг Туркиядаги давлат тўнтаришига уринишдан сўнг биринчи хориж сафари ҳисобланади. Айни вақтда, бу Путин ва Эрдўғоннинг 2015 йил ноябрида рус қирувчи самолётининг турк ҳарбийлари уриб туширгани оқибатида Россия-Туркия муносабатлари совиб кетганидан кейинги биринчи учрашувидир.
Эрдўғон «тарихий воқеа» деб таърифлаган бўлажак учрашувларда Туркия ва Россия президентлари икки томонлама муносабатларнинг барча муҳим йўналишларини — энергетика ва озиқ-овқат маҳсулотларини етказиб беришдан тортиб туризмгача, шунингдек, Россияда Туркия қурилиш компанияларига нисбатан жорий этилган чекловларни бекор қилиш масалаларини ҳам кўриб чиқади.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)