АҚШнинг Delta авиакомпанияси парвозлар тикланганини маълум қилди, бироқ учишлар кечиктирилиши, айрим рейслар эса бекор қилиниши сақланиб қолмоқда. Бу ҳақда «Ведомости» хабар бермоқда.
«8 август, маҳаллий вақт билан 10:30 даги ҳолатга кўра, Delta режалаштирилган салкам 6000 рейсдан 800 тасини амалга оширди. Тизим тикланмоқда, парвозлар бажарилиши бошланди, бироқ ҳозирча рейслар кечиктирилиши ва бекор қилиниши давом этмоқда», — дейилади авиакомпания хабарида.
Дунёдаги йирик авиакомпаниялардан бири бўлган ва 96 мамлакатдаги 400 дан ортиқ аэропортга парвозларни амалга оширадиган Delta рейслари 8 август, душанба куни эрталаб содир бўлган компьютер тизимидаги носозлик туфайли бутун дунё бўйлаб кечиктирилганди. Кейинчалик компания носозликка ўзининг штаб-квартираси жойлашган Атланта шаҳрида (Жоржия штати) электр энергиясида узилиш сабаб бўлганини маълум қилди.
Изоҳ (0)