Польшанинг Ченстохова шаҳри прокуратураси 46 ёшли россияликка нисбатан Польша Ҳаво кодексида назарда тутилган талабларни бузганлик бўйича айблов эълон қилди. Бу ҳақда «Европейская правда» хабар бермоқда.
29 июль куни россиялик учувчи бошқарувида Чехиянинг Моравска-Тршебова шаҳридан Польшанинг Радом шаҳрига учиб кетаётган енгил моторли самолётни Польша ҳарбий ҳаво кучларига тегишли F-16 қирувчи самолётларини тутиб қолган эди.
Қайд этишларича, россиялик учувчи Жаҳон ёшлар куни муносабати билан парвозлар чекланган ҳудудга кириб бориб, ҳаво қонунчилигини бузган, бундан ташқари, парвоз режасини тақдим этмаган.
Россия фуқароси гумонланувчи сифатида сўроқ қилинган ва ўзига қўйилган айбловни тан олмаган. Айни вақтда, унга нисбатан ҳукм чиқариш ва 9 минг злотий (тахминан 2,3 минг доллар) миқдорида жарима солишни сўраб, талабнома берган.
Хабар беришларича, Радомдаги самолёт спорти бўйича жаҳон чемпионатида қатнашаётган россияликни ҳеч ким ҳибсга олмаган, у исталган вақтда Польшани тарк этиши мумкин. Суд маҳкамаси унинг иштирокисиз ҳам ўтказилиши мумкин.
Польша қонунчилигига кўра, агар россиялик учувчи айбдор деб топилса, беш йилга озодликдан маҳрум этилиши мумкин. Айни вақтда бу жазо турини жарима билан алмаштириш ҳам мумкин.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)