Индонезиядаги мактабларда Pokemon Go’ни ўйнашга тақиқ қўйилади

Индонезия ҳукумати мамлакат мактабларида машҳур Pokemon Go ўйинини ўйнашга тақиқ қўяди, деб хабар беради «ТАСС».

«Ўқув муассасаларига ўйин ўрнатилган смартфонларни олиб келишни тақиқловчи фармойиш тайёрлаб қўйилган», – дея маълум қилди Аёлларнинг ҳуқуқини кенгайтириш ва болаларни муҳофаза қилиш вазири Йохана Сусана Йембисе.

«Бундай ўйинлар болаларнинг ақлий ривожланишига зарар етказиши, уларни эринчоқ қилиши мумкинлиги учун шундай чоралар қўллаяпмиз», – дея қўшимча қилди вазирлик раҳбари, аммо тақиқ қачон кучга киришига ойдинлик киритмади.

• Индонезияда полициячиларга Pokemon Go ўйнаш тақиқланди

Аввалроқ Индонезия президенти саройи, полиция штаб-квартираси ҳамда Мудофаа вазирлиги муассасаларида покемонларни овлаш расман тақиқланганди.