Ўзбекистоннинг Лондондаги элчихонаси ёзги қабули доирасида «Ўзбекистонга ташриф буюришга 10 сабаб» китобининг презентацияси ўтказилди. Бу ҳақда UzDaily хабар бермоқда.
Ўзбекистоннинг туристик ва гастрономик салоҳиятини намоён этишга қаратилган тадбирга 130 дан ортиқ меҳмон ташриф буюрган бўлиб, улар орасида парламентарийлар, идоралар ва бизнес жамоалари вакиллари, маданият ва санъат аҳли, жамоат ташкилотлари раҳбарлари ва ОАВ ходимлари бор эди.
Меҳмонларга палов тайёрлаш бўйича маҳорат дарсида иштирок этиш, анъанавий куйларни тинглаш, миллий таомлардан тотиб кўриш, мультимедия кўргазмаси ва фильмларни томоша қилиш таклиф этилди. Шунингдек, қабул доирасида Ўзбекистон ҳақидаги иккита янги китобни имзолаш маросими бўлиб ўтди. Булар — ёзувчи Каролин Эрденнинг «Самарқанд: Марказий Осиё таомномалари коллекцияси» ва Dinara&Co. халқаро жамоасининг «Ўзбекистонга ташриф буюришга 10 сабаб» коллекцион нашри.
304 саҳифали китоб замонавий Ўзбекистоннинг энг яхши фотосуратларини ўзида жамлаган. Китобда лойиҳа учун махсус тайёрланган фотосетлар ҳамда охирги 15 йиллик архив кадрларини кўриш мумкин.
Яқин вақтда халқаро онлайн дўконлар саҳифаларида, нуфузли кутубхоналарда ҳамда Буюк Британия китоб дўконларида нашрнинг релизи берилиши кутилмоқда. Китоб нусхалари Британия кутубхонасига, Виктория ва Альберт номидаги қироллик кутубхонасига совға қилинди, шунингдек, Букингем саройига юборилди.
Изоҳ (0)