Ироқ кассация суди қуйи инстанция суди Тикрит шаҳрида 1700 дан ортиқ ироқлик ҳарбийлар ўлимида айбдор бўлган 40 кишига нисбатан чиқарган ўлим жазоси ҳукмини тасдиқлади, деб ёзади «ТАСС».
Ироқ прокуратураси вакили сўзларига кўра, пухта текширувдан сўнг суд машҳур «Спайкер ҳарбий базаси ҳақидаги иш» бўйича олий жазога маҳкум қилинганларнинг апелляциясини рад этди. Ўлим жазоси ҳақидаги қарор жорий йилнинг 18 февралида Бағдод жиноий суди томонидан 40 кишига нисбатан чиқарилди. Етти киши эса жиноятга алоқаси исботланмагани туфайли суд залида ҳибсдан озод этилди.
Ўтган йилнинг март ойи охирида Ироқнинг Тикрит шаҳри озод этилгач, шаҳар атрофларида ироқлик аскарлар ва тинч аҳоли вакиллари оммавий кўмиб ташланган бир нечта қабрлар топилди. Уларнинг кўпчилиги террорчиларнинг «Спайкер» ҳарбий базасидан олган қасоси қурбонлари эканлиги аниқланди. Тикрит озод қилинишидан бир неча ой аввал 1700 нафар ироқлик ҳарбийлар террорчилар қўлига асир тушган, уларнинг барчаси экстремистлар томонидан қийнаб ўлдирилган.
Изоҳ (0)