Номаълум шахснинг Лос-Анжелесдаги (АҚШ, Калифорния штати) уйлардан бирига автомобилида келиб урилиши оқибатида бир киши ҳалок бўлди ва 8 киши жароҳат олди. Бу ҳақда «ТАСС» хабар бермоқда.
Associated Press манбаларига кўра, седанни бошқарган ҳайдовчи юқори тезликда диний йиғинлар учун тўпланиладиган жой вазифасини ўтаган уйга бостириб кирган. Ҳодиса пайтида бинода Инжил ўқиш билан машғул бўлган асосан кекса ёшдаги кишилар тўпланганди. Машина деворни бузиб, иморатнинг ичига тўлиқ кириб кетган.
Уйда бўлган бир неча киши автомобиль томонидан қисилиб қолган, уларга қутқарув хизмати ходимлари ёрдам кўрсатишига тўғри келди. Жабрланганлардан айримлари касалхонага ётқизилди.
Автомобиль ҳайдовчиси ҳодиса жойидан яширинди. У қасддан ҳаракат қилгани ёки бошқарувни уддалай олмагани ҳозирча номаълум.
Изоҳ (0)