Узоқ Шарқда шифокорлар биринчи марта ёш болага жағ ўстирди

Узоқ Шарқ федерал университетининг тиббиёт марказида ёш боланинг пастки жағ реконструкцияси бўйича операция ўтказилди. Бу ерда биринчи марта компрессион-дистракцион остеосинтез (жағ ўстириш) амалиёти муваффақиятли ўтказилди, деб хабар бермоқда «Вести.ru».

«Бундай операцияни амалга ошириш учун махсус аппарат пастки жағ суякларининг бўлакларига ўрнатилади. У керакли ҳажмдаги жағ ўсишига ёрдам беради», – деди жарроҳ Юлия Оконская.

«Илгари аппаратлар жуда катта, травматик бўлиб, лунждаги юмшоқ тўқималар орқали жағга ўрнатилар эди. Бутун қурилма ташқарида турарди ва ёш болалар одатий ҳаёт тарзини кечира олмасди», – дея қўшимча қилди жарроҳ.

Замонавий қурилма кичик ҳажмда бўлиб, тўқималар тагида жойлашган. Жағни ўстириш жараёни камида тўрт ой давом этади ва бола бу вақт мобайнида мактаб ёки боғчага қатнаши мумкин бўлади. Кейин эса аппарат жарроҳлик излари қолдирилмаган ҳолда олиб ташланади.

Юлия Оконскаянинг фикрича, бу каби операциялар Узоқ Шарқ тиббиёти учун катта муваффақият саналади. Авваллари бундай ёрдам фақат катталарга кўрсатилган, аммо замонавий технологияларнинг ривожланиши шарофати билан ёш болаларга ҳам ёрдам кўрсатиш имкони пайдо бўлди.