Uzoq Sharqda shifokorlar birinchi marta yosh bolaga jag‘ o‘stirdi
Uzoq Sharq federal universitetining tibbiyot markazida yosh bolaning pastki jag‘ rekonstruksiyasi bo‘yicha operatsiya o‘tkazildi. Bu yerda birinchi marta kompression-distraksion osteosintez (jag‘ o‘stirish) amaliyoti muvaffaqiyatli o‘tkazildi, deb xabar bermoqda “Vesti.ru”.
“Bunday operatsiyani amalga oshirish uchun maxsus apparat pastki jag‘ suyaklarining bo‘laklariga o‘rnatiladi. U kerakli hajmdagi jag‘ o‘sishiga yordam beradi”, – dedi jarroh Yuliya Okonskaya.
“Ilgari apparatlar juda katta, travmatik bo‘lib, lunjdagi yumshoq to‘qimalar orqali jag‘ga o‘rnatilar edi. Butun qurilma tashqarida turardi va yosh bolalar odatiy hayot tarzini kechira olmasdi”, – deya qo‘shimcha qildi jarroh.
Zamonaviy qurilma kichik hajmda bo‘lib, to‘qimalar tagida joylashgan. Jag‘ni o‘stirish jarayoni kamida to‘rt oy davom etadi va bola bu vaqt mobaynida maktab yoki bog‘chaga qatnashi mumkin bo‘ladi. Keyin esa apparat jarrohlik izlari qoldirilmagan holda olib tashlanadi.
Yuliya Okonskayaning fikricha, bu kabi operatsiyalar Uzoq Sharq tibbiyoti uchun katta muvaffaqiyat sanaladi. Avvallari bunday yordam faqat kattalarga ko‘rsatilgan, ammo zamonaviy texnologiyalarning rivojlanishi sharofati bilan yosh bolalarga ham yordam ko‘rsatish imkoni paydo bo‘ldi.
