Футзал бўйича ЖЧ—2016 иштирокчилари. Россия: Жаҳон Чемпионатларида энг кўп ўйнаган бешинчи жамоа

Россия терма жамоаси Европа Чемпионатида бўлгани каби, Жаҳон Чемпионатида ҳам фаовритлардан бири ҳисобланади.

Футбол бўйича Россия миллий терма жамоаси мундиалга чиқса дўппсини осмонга отиши мумкин, бироқ футзал умуман бошқа масала. Бу соҳада руслар анча олдинга ўтиб кетишган. Терма жамоанинг дунёдаги обрўаси бир мунча баланд ҳисобланади.

Колумбияга йўл

Россия терма жамоаси Европа Чемпионати гуруҳ босқичини камтарона бошлаб, биринчи учрашувда Қозоғистон устидан 2:1 ҳисобида зафар қучди. Иккинчи ўйинда эса Хорватия билан кутилмаганда дуранг ўйнади — 2:2. 4 очко термага гуруҳни пешқадам сифатида якунлаш учун етарли бўлди.

Чорак финалда руслар Озарбайжон термаси устидан 6:2 ҳисобида зафар қучди. Ярим финалда эса серблар 3:2 ҳисоби билан мағлуб этилди. Россиянинг тиши фақатгина испанларга ўтмади. Европа чемпиони номини аниқлаб берадиган учрашувда 7:3 ҳисоби қайд этилди. Бу борада Испания билан рақобатлашиш қийин.

Кучли томонлари

Россия терма жамоасининг ҳимояси ҳақида илиқ фикрлар билдириш мумкин. Европа Чемпионатининг саралашида Россия уч учрашувда бор йўғи 2 та гол ўтказиб юборди. Бундай натижани руслардан бошқа фақатгина Испания қайд эта олганди.

Бироқ бу ҳали ҳаммаси эмас. Россиянинг олдинги чизиғида суянган тоғлари бор эканини унутмаслик керак. Эдер Лима 2014 йил Бельгияда бўлиб ўтган Европа Чемпионатида барчани ўзига қаратиб, тўпурарлик қобилиятини намойиш этганди. 2012 йил Таиландда бўлиб ўтган Жаҳон Чемпионатида эса у Adidas’нинг «Олтин бутса» совринини ўзиники қилиб олган. Ўшанда биргина Саломон оролларига қарши беллашувда у 7 та гол уришга муваффақ бўлганди.

Сербияда бўлиб ўтган Евро—2016 турнирида финалга қадар етиб боргани Россия терма жамоасининг кучини кўрсатиб турибди. Алоҳида ўйинлардаги қийинчилик ҳеч нарса эмас, Россиянинг каттагина захираси ва бир неча йиллик тажрибаси бор. Бу Колумбия мундиалида ҳам ас қотиши керак.

Жаҳон Чемпионатларидаги иштироки

Бор йўғи икки мундиал Россия терма жамоасиз ўтди. 1989 йил Голландия мезбонлик қилган Жаҳон Чемпионати ва 2004 йил Хитой Тайпейида бўлиб ўтган мундиалда руслар иштирок эта олмади.

1996 йил Россия яхшигина муваффақиятга эришди. Испанияда бўлиб ўтган дунё чемпионатида терма жамоа учинчи ўринни қўлга киритди. Гватемала—2000 ва Бразилия—2008 да эса Россия ярим финалга қадар етиб бориб, якунда тўртинчи ўрин билан кифояланди.

Жаҳон Чемпионатларида фақатгина 4 та терма жамоа Россиядан кўпроқ ўйин ўтказган, холос. Мана шу факт ҳам терма жамоанинг кучи ҳақида янада тўлиқ маълумот бериши мумкин.