Futzal bo‘yicha JCh—2016 ishtirokchilari. Rossiya: Jahon Chempionatlarida eng ko‘p o‘ynagan beshinchi jamoa

Rossiya terma jamoasi Yevropa Chempionatida bo‘lgani kabi, Jahon Chempionatida ham faovritlardan biri hisoblanadi.

Futbol bo‘yicha Rossiya milliy terma jamoasi mundialga chiqsa do‘ppsini osmonga otishi mumkin, biroq futzal umuman boshqa masala. Bu sohada ruslar ancha oldinga o‘tib ketishgan. Terma jamoaning dunyodagi obro‘asi bir muncha baland hisoblanadi.

Kolumbiyaga yo‘l

Rossiya terma jamoasi Yevropa Chempionati guruh bosqichini kamtarona boshlab, birinchi uchrashuvda Qozog‘iston ustidan 2:1 hisobida zafar quchdi. Ikkinchi o‘yinda esa Xorvatiya bilan kutilmaganda durang o‘ynadi — 2:2. 4 ochko termaga guruhni peshqadam sifatida yakunlash uchun yetarli bo‘ldi.

Chorak finalda ruslar Ozarbayjon termasi ustidan 6:2 hisobida zafar quchdi. Yarim finalda esa serblar 3:2 hisobi bilan mag‘lub etildi. Rossiyaning tishi faqatgina ispanlarga o‘tmadi. Yevropa chempioni nomini aniqlab beradigan uchrashuvda 7:3 hisobi qayd etildi. Bu borada Ispaniya bilan raqobatlashish qiyin.

Kuchli tomonlari

Rossiya terma jamoasining himoyasi haqida iliq fikrlar bildirish mumkin. Yevropa Chempionatining saralashida Rossiya uch uchrashuvda bor yo‘g‘i 2 ta gol o‘tkazib yubordi. Bunday natijani ruslardan boshqa faqatgina Ispaniya qayd eta olgandi.

Biroq bu hali hammasi emas. Rossiyaning oldingi chizig‘ida suyangan tog‘lari bor ekanini unutmaslik kerak. Eder Lima 2014-yil Belgiyada bo‘lib o‘tgan Yevropa Chempionatida barchani o‘ziga qaratib, to‘purarlik qobiliyatini namoyish etgandi. 2012-yil Tailandda bo‘lib o‘tgan Jahon Chempionatida esa u Adidas’ning “Oltin butsa” sovrinini o‘ziniki qilib olgan. O‘shanda birgina Salomon orollariga qarshi bellashuvda u 7 ta gol urishga muvaffaq bo‘lgandi.

Serbiyada bo‘lib o‘tgan Yevro—2016 turnirida finalga qadar yetib borgani Rossiya terma jamoasining kuchini ko‘rsatib turibdi. Alohida o‘yinlardagi qiyinchilik hech narsa emas, Rossiyaning kattagina zaxirasi va bir necha yillik tajribasi bor. Bu Kolumbiya mundialida ham as qotishi kerak.

Jahon Chempionatlaridagi ishtiroki

Bor yo‘g‘i ikki mundial Rossiya terma jamoasiz o‘tdi. 1989-yil Gollandiya mezbonlik qilgan Jahon Chempionati va 2004-yil Xitoy Taypeyida bo‘lib o‘tgan mundialda ruslar ishtirok eta olmadi.

1996-yil Rossiya yaxshigina muvaffaqiyatga erishdi. Ispaniyada bo‘lib o‘tgan dunyo chempionatida terma jamoa uchinchi o‘rinni qo‘lga kiritdi. Gvatemala—2000 va Braziliya—2008 da esa Rossiya yarim finalga qadar yetib borib, yakunda to‘rtinchi o‘rin bilan kifoyalandi.

Jahon Chempionatlarida faqatgina 4 ta terma jamoa Rossiyadan ko‘proq o‘yin o‘tkazgan, xolos. Mana shu fakt ham terma jamoaning kuchi haqida yanada to‘liq ma’lumot berishi mumkin.