Россия томони Халқаро олимпия қўмитаси 24 июль, якшанба куни россиялик спортчиларнинг 2016 йил августида Рио-де-Жанейрода бўлиб ўтадиган ёзги Олимпиада ўйинларидаги иштироки ҳақида қабул қилган қарори учун миннатдор. Бундай баёнот билан Россия спорт вазири Виталий Мутко чиқиш қилди, деб ёзади «Ведомости».
«ХОҚ қабул қилган қарор Бутунжаҳон аксилдопинг агентлиги (WADA) мустақил комиссиясининг маърузасига асосланган ҳолда пухта ўйланган, у жаҳон спорти манфаатлари ва олимпия оиласи бирлиги йўлида қабул қилинган ва холисдир», — деди Мутко. «Биз ХОҚдан бундай қарор учун миннатдормиз», — дея қўшиб қўйди у.
ХОҚ Россиянинг иштирокини тақиқлаш юзасидан қарор қабул қилишдан бош тортди ва бу ҳуқуқни халқаро спорт федерацияларига топширди.
«ХОҚ тегишли ҳужжатда кўрсатилган талабларга жавоб бермаган бирорта россиялик спортчини Рио–2016 Олимпия ўйинларига яқинлаштирмайди», — дейилади Ижроқўм хабарномасида.
ХОҚ қарорига кўра, Россия Олимпия термасининг барча аъзолари қўшимча допинг текширувидан ўтади. Ундан ўта олмаганлар ХОҚ аккредитациясидан маҳрум бўлади.
Изоҳ (0)